Одбележување на 5 мај – Европскиот ден за хигиена на рацете: СПАСЕТЕ ЖИВОТ, Чистете ги рацете
По повод Европскиот ден за хигиена на рацете: СПАСЕТЕ ЖИВОТ, Чистете ги рацете, востановен од страна на Светската здравствена организација во 2010 година во рамки на Првиот глобален предизвик за безбедност на пациентите „Чиста нега е безбедна нега“, на 5 мај (понеделник) со почеток во 13.00 часот во aмфитеатарот на Деканатот на Медицинскиот факултет–Скопје ќе се одржи стручен состанок на тема „Хигиената на рацете во спречување на ширењето на мултирезистентните микроорганизми“.
Насекаде во светот, секојдневно умираат илјадници луѓе од инфекции стекнати за време на добивање здравствена нега. Особено опасни се интрахоспиталните инфекции предизвикани од мултирезистентни микроорганизми. Нивното ширење во здравствените институции е често и се одвива преку контаминирана опрема и околина на пациентите, како и преку контаминираните раце на здравствените работници, пациентите и посетителите. Оттука, хигиената на рацете претставува една од клучните стандардни мерки на претпазливост.
Со цел унапредување на хигиената на рацете и подобрување на услугите на здравствените институции насекаде во светот, м-р Неда Милевска Костова, извршната директорка на ЦРИС Студиорум, ќе присуствува на стручниот состанок каде што ќе ги претстави активностите поврзани со Европскиот ден за рационална употреба на антибиотиците, како и соработката со НВО за антимикробна резистенција во Македонија. ЦРИС Студиорум се придружува кон организацијата на настанот во соработка со Министерството за здравство, Мултисекторската комисија за следење на антимикробната резистeнција при Министерството за здравство, Институтот за јавно здравје, Медицинскиот факултет-Скопје, а со поддршка на Канцеларијата на СЗО во Република Македонија.
Материјали за преземање:
- Програма со агенда
- Информација за новинари
- Леток [мк] | Леток [ал]
- Постер 1 | Постер 2
- Дизајн за магнети