Студија „Национални институции за Човекови права: нормативни модели и предизвици“
ЦРИС Студиорум ја објави студијата „Национални институции за Човекови права: нормативни модели и предизвици“ во која се разгледуваат двете национални институции за Човекови права во Македонија – Народниот правобранител и Комисијата за заштита од дискриминација.
ЦРИС Студиорум ја објави студијата „Национални институции за Човекови права: нормативни модели и предизвици“. Во студијата се разгледани двете национални институции за Човекови права – Народниот правобранител и Комисијата за заштита од дискриминација. Таа се фокусира на релевантните аспекти од применетите политики и од законите и дава заклучоци и препораки за реформирање на сегашната инстутиционалната рамка, во согласност со меѓународните стандарди, вклучително и со обврските кои произлегуваат за Македонија од меѓународното право за Човекови права. Со цел подобро засновање и формулирање на препораките, беа подготвени и споредбена студија на пет НИЧП, како и проценка на ефективноста при користењето на ресурсите на овие НИЧП, кои се вклучени како анекс во оваа студија.
Во студијата се вклучени коментарите и препораките дадени од експертска група која во септември 2012 година го разгледуваше првиот нацрт на студијата и оние дадени од панелистите и учесниците на меѓународната конференција „Националните институции за човекови права и промоцијата и заштитата на Човековите права во Македонија и Западниот Балкан“ која се одржа во Скопје во октомври 2012 година. Студијата беше рецензирана од Проф. Ричард Карвер (професор на универзитетот Оксфорд Брукс) и Уранија Пировска (извршна директорка на Хелсиншкиот комитет на Република Македонија).
Студијата беше подготвена во рамките на проектот „Решавање на институционална сложувалка: Каков модел на Национална институција за Човекови права за Македонија“, чија цел е да се донесат препораки за креирање на модел за НИЧП во Македонија во согласност со меѓународните стандарди и најдобри практики, како и со политичките и социо-економските карактеристики на земјата. Се надеваме дека истата ќе служи како основа за започнување на дискусии за усогласување на институционалната рамка со меѓународните стандарди за НИЧП.
Други линкови